المدونة التالية
كافة المدونات

همسة ل أختي في الله احذري من هؤلاء…..(((بقلم // حبيبي خبيب)))

كتبها أحمد محمد مرسي ، في 25 يونيو 2007 الساعة: 00:34 ص

السلام عليكم ورحمة الله وبركاته

اللي يعيش ياما يشوف ، واللي يلف الدنيا يقابل نصابين كتير ، واللي يقعد على النت كتير يقابل نصابين بس من نوع تاني : نصابين البنات !! دول بيكونوا منشنين على البنات ، بيدوروا عليهم عشان يصطادوهم ، وكل واحد وأسلوبه ..
قابلت منهم أنواع كتير ، وعرفت عنهم معلومات أكتر ، وحبيت أنقل "خبرتي" عشان الناس تاخد بالها منهم وتعرف حقيقتهم ودول اللي جم في دماغي دلوقتي

(1) النصاب المتدين
كلامه بيقول إنه عايش عشان يرضي ربنا وييعبده ، لكن حاله بيقول إن همه البنات ليس إلا .
لما يكون بيكلم بنت ، أكيد كلامهم بيدور حول تفسير آيه !! أو معلومة دينية أو حتى رأي فلسفي كبير وكلام مكلكع في قضية من قضايا الحياة !!
طول ما هو قاعد معاها مش في دماغه صلاة ، وإذا افتكرها يبقى عشان يعرفها إنه بيصلي !! لأ وفي المسجد كمان !! ( بعد إذنك هانزل أصلي في الجامع وأرجع نكمل كلامنا) - ( صليتي الفجر النهاردة ؟؟ مرنتيش عليا ليه ؟)
راجع الكلام هتلاقيه مليان كلمات على غرار : أختي الغالية / بارك الله فيكي / ادعيلي
ومفيش مانع كمان يذم الولاد الوحشين اللي بيضحكوا على البنات !!
بالتأكيد هتلاقيهم مرة اتفقوا يحفظوا القرآن مع بعض !! أو حتى ينصحها بالحجاب أو قيام الليل ( هازعل بجد لو عرفت إنك قلعتي الحجاب )

النتيجة قبل النهائية : هي : بأحبك ، هو : بأحبك ( ايه الالتزام ده كله !!)
النتيجة النهائية : غالبا بطيخ .. وبيبانوا قدام بعض وبيفقدوا احترامهم لنفسهم ، وحتى بيفقدوا الخيط الرفيع اللي كان بيربط كل واحد فيهم بالله
النتيجة بعد النهائية : هتقول ايه لربنا لما يواجهك بجريمتك ؟ بتنصب باستخدام دين الله وكلام الله ؟ انت عارف مصيبة "من حفظ القرآن ليجاري به العلماء أو ليماري به السفهاء" ؟ أهو انت زيه كده أو أسوأ

نصيحة : لا يتقرب (بضم الياء) إلى الله بمعصيته .. متضحكش على نفسك ومتضحكيش على نفسك وتفتكري إنه بيشدك ناحية الصح ، بالعكسده بيزقك وبياخد بحجزك عن الصح

"الذين ضل سعيهم في الحياة الدنيا وهم يحسبون أنهم يحسنون صنعا"

لكن لو تسمحلى اضيف نوع من النصب مش هقول النصابين بس نصب جديد شويتين
 
ويمكن متكلمناش فيه قبل كده وممكن نكون احنا النصابين ..
اه …انا او انتم …كلنا

 
طيب ندخل فى الموضوع …

متدين .. او متدينه …

(ليه بقول متدينين لان المفروض ان دول فاهمين والشيطان هيدخل لدول الاول ويهمه دول اكتر )

لما يجمعهم كليه واحده ولا سكشن واحد ولا مجال واحد ولا حتى عمل واحد وحد فيهم يكلم التانى عن حياته الخاصه او اى شىء فيها ده يبقى ايه ؟؟

نصب

ليه بقى ؟
ايوة نفسك بتنصب عليك وانت مصدق وعجبك الوضع كده
طيب سؤال :
هو ولا هى تقربيلك ايه ؟؟
امك ولا اختك ولا زوجتك ؟؟؟
ابوك ولا اخوكى ولا زوجك ؟؟؟
اصل ببقى عايز ورق وهى الى بتعمل المحاضرات …
ماشى وده ايه علاقته بحياتك يعنى بتحب ايه ومبتحبش ايه ؟؟ يعنى ينفع تكلمها فى الحاجات الى بتكلم فيها صديقك الولد او انتى ينفع تشكيله مشاكلك الى بتشكيها لصديقتك البنت ؟؟؟

لو كان كده بقى يبقى معلش اخويا ملتزم برضو ومع اختك فى الكليه ممكن يبقى يكلمها ؟؟؟

خلونا نسأل نفسنا او بمعنى اصح نقف واقفه جاده
…اشمعنى دى واشمعنى ده ؟؟ هو البنات خلصت !!! ولا الشباب خلصوا !!!
نفسنا بتنصب علينا واحنا عجبنا الحال ومكملين ….
نصب ده ولا مش نصب

مينفعش تقولى انك لما تكلم واحده عن حياتك مش هتتعلق بيك ومينفعش تقوليلى انك لما تكلمى واحد عن حياتك الخاصه وبتحبى ايه وعايزة ايه مش هيتعلق بيكى ؟؟
يبقى الشيطان لازمته ايه بقى ؟؟؟ التعود نفسه تعلق وبعدين نرجع نغنى ظلموه

ممكن منكونش واخدين بالنا وعادى جدا وبنتكلم بمنتهى التلقائيه .. لكن معلش لو مخدتش بالى مرة والتانيه ماشى لكن اراجع نفسى بقى واظبطها وافتكر ان

ربنا بيقول ليكى ((ولا متخذات اخدان ))

وليك ((ولا متخذى اخدان ))
الخدن :الصاحب او الصديق ..

الشيطان ينصب علينا فيقابل ده هوى نفس فتنصب هى كمان علينا واحنا بدل ما نقفل الباب لا عجبنا ونفتح ونتلكك بقى وننصب على ضميرنا …
ويا سلاااام على التلاكيك والله بنتتفنن

ده بقى النصب الى كان نفسى اقولهولكم من زمااان

كل النصابين الى فاتوا كانوا عارفين انهم بينصبوا من البدايه لكن ده نصب تدريجى ويمكن بنفوق لما بينبقى اتعودتنا اننا نكلم بعض وممكن نفضل مكملين لما نفسنا تقولنا لاااا بس احنا بنتكلم فى حاجات مهمه بس اصل ملقيتش غيرها اكلمها وكنت عايز اتكلم اصل هو شخصيه محترمه جدا ومش ممكن يكون بيلعب بيا اصل هى متدينه واكيد هنحافظ على الحدود الى بينا اصل كنت عايز اعرف رأيها فى حاجه اصل فضولى بيخلينى اسالها ….
نصب ده ولا مش نصب ؟

اللهم احفظنا واياكم
(2) النصاب الرومانسي
في الغالب بيكون واقع في مشكلة : مشكلة في البيت أو مشكلة عاطفية - أي مشكلة والسلام - ويا عيني دايما بيكون بيكون مظلوم وتعبان وبيتقطع والدنيا كلها عليه ( وملقاش غيرها يشكيلها على أساس هي المنقذ !!) . لكنه صامد بس عشان رجولته ، ولما بيقعد لوحده يقعد ييعيط ويسمع عبد الحليم ويشتكي ظلم الأيام له !!
(أنا تعبان ومتضايق وحاسس بالوحدة ومحدش فاهمني غيرك ، وباستريح معاكي انتي بس )
كلامه دايما عن الحب والعاطفة وازاي إنهم أسمى شئ في الوجود ، ولو كاتب 10 سطور هتلاقي 9 منهم ( حب / عاطفة / رومانسية / قلب / عياط / دموع / خجل / مشكلة ) حاجة تجيب غثيان يعني
حافظ كل المطربين والمطربات والممثلين والممثلات ومتابع الأفلام الرومانسية القديمة والجديدة ، وتحس كده من كلامه إن الواد ايه : لو الدنيا كلها وقفت بينه وبين "أخته" - اللي هي البت بتاعته يعني !! ( اللي غالبا بيحكي مغامراته معاها لأصحابه إلا إذا كان ملوش أصحاب ولاد أساسا ) - هيتغلب عليها ، ومش هيهتم بأي حاجة عشان علاقتهم "الطاهرة البريئة" - اللي ميقدرش يقول لأبوه عليها ولا تقدر تقول لأبوها عليها - تفضل زي ما هي ( أنا باقولك الكام ده بس عشان انتي زي أختي !!)

نصيحة : طبيعة البشر كده : الرجل بيميل للكلام مع البنت والعكس ، ودي غريزة ربنا خلقها لكنه في نفس الوقت وضع قوانين تنظمها لأن في النهاية الندم والدموع الحقيقية مبترجعش حاجة - ولأنه في النهاية الله سبحانه وتعالى هو اللي هيحاسبنا على العلاقة "الطاهرة البريئة" دي بين اتنين اخوات!!
نصيحة تانية : تأكدي إن أي حاجة مكانها الظلام فهي غلط - محدش بيتكسف يقول (فلانة دي مراتي) أو يقول ( فلان ده أخويا وحبيبي) ، لكن تقدري تقولي للناس أو حتى لأهلك (فلان ده
أخويا ومفيش بينا أكتر من كده ) ؟

(3) النصاب الروش .. الكووووووول

(هاااااااااااااااي) ..
نموذج للشاب المنفتح ماعندوش مشكله في اي حاجة ((peace)
بالنسبه له اي جمله تحتوي على واحده من الكلمات دي( الله- الرسول الاسلام - حرام- لا يجوز- او حتى حلال ) تدل على تخلف ورجعيه وحاجة مش cool
ما يعرفش في الدين غير آيتين (الدين يسر_وربك رب قلوب!!!)
وتحاول تفهمه ان دول مش آيات يقولك (so what ? ايه التشدد ده) هو احنا غلطنا في البخاري!!
بالنسبة له جريمة انك مانزلتش سيتي ستارز في الويك اند او ماسفرتش مارينا في الsummer vacation
مش قادر يفهم الناس الرجعيين اللي مش بيعترفوا بالصداقةبين الولد والبنت ومش قادرين يفهموا الفرق بين الفريند والgirlfriend !!
صاحبنا ده ممكن مانعتبروش نصاب اوي يعني ممكن نعتبره منصوب عليه من الاعلام والثقافة الغربية المستوردة
كلامه بينحصر بين قضيتين مهمتين ، العربيات والبنات ، ولو فيه شريط جديد يبقى دي حالة طارئة ، وضارب الدنيا والدين طناش
بيعتبر إن من حقه إن بابا يلبي كل رغباته وماما تقعد تخدم فيه طول النهار ، وهو - كفاية عليه إنه موجود أصلا .. هيقطع نفسه يا عيني ؟
شكله مكبر دماغه .. لكن الواقع بيقول إنه غالبا مفيش دماغ أصلا عشان يكبره ، وعادة هي دي نفس نوعية دماغ البنت الي بتحب الصنف ده
وفي الغالب يا عيني بيطلع صاحبنا النصاب ده في الآخر من نوعية صاحبنا بتاع زمان اللي كان واهمنا إنه بيتكلم ألماني ويقعد يقول (لنجر فلسكاك فلشته شينا) وفي الآخر طلع بيتكلم كوابري أساسا وقصده (النقر في السكك في الشتاء شينة يعني قبيحة )!!!
نصيحة : "ولا دنيا لمن لم يحي دينا"
***
(4) النصاب المفكر / الثورجي

أنواع كتير وأبرزهم نوعين : ليبرالي / شيوعي

كاره للمجتمع ولحظه العاثر اللي طلعه وسط ناس هو خسارة فيهم أصلا
بيعتبر إن (العرب - الشرق - الإسلام ) يعني جمال وصحراء وخيام ، ومفيش أمل منهم لو بعد مليون سنة ، وإن النجاة فيما جاءت به أمريكا وأوروبا
صاحبنا مثقف - أو هكذا يبدو - عارف كلمتين عن (تشارلز ديكنز - وهـ.ج.ولز - وجول فيرن) وكلمتين عن (ماري كوري - ونسبية أينشتاين - ومندل - وداروين) وكلمتين كمان عن (شافيز - وكاسترو - وجيفارا - وغاندي ) وبيضرب ده كله في الخلاط عشان يطلع الحاجة الأصفرا اللي هيسقيها للبنت !!
مبهور بالقشرة ، ومش واخد باله إنه مفيش لب ، مؤمن إن لا يمكن عربي أو مسلم يكون زي دول إلا لو سابه من حوار الإسلام ده خالص وركز في المفيد : رأسمالية - شيوعية - اشتراكية على حسب
مفيش مانع يكون عنده قدر من التدين ، لكنه التدين الذي لا يتعارض مع مشيئة الغرب !!
تدين لا يعترف بمعظم الغيبيات ، لا يعترف بالجن (انتو لسه عايشين في العصور الوسطى ؟) ولا يعترف بحديث الذبابة والإناء (ايه القرف ده ؟) ولا يعترف بحديث الختان (وحشية) ولا بآيات السحر والحسد (خرافات وخزعبلات وجهل يرفضه العقل والعلم)!!
تدين يعتبر الوسطية (حجة الضعيف اللي مش قادر ياخد قرار ، العالم :يمين وشمال وبس)
ومش مدرك إن أعلى نقطة في الجبل تقع عند منتصفه !!
مقادير النصب : خمس معالق إحباط + شوية كلام كبير مع رشة من المصطلحات البرجوازية الراديكالية الفاشية التقلية !!+ كوبايتين فضفضة وكوباية مشاعر وأحاسيس ضعف (عشان يبقى الواد جمع بين العلم والحساسة في نفس الوقت !!!)

نصيحة له : "إن الدين عند الله الإسلام" .. لف ودور واتخذ من الأديان ما شئت ، وهتلاقي إن "ومن أعرض عن ذكري فإن له معيشة ضنكا"
نصيحة لها : أسهل حاجة الكلام الكبير ، لكن الرجل الحق بيستخدم الكلام في مكانه الصحيح ، وتأكدي إن "من كثر كلامه قل عمله"

***
و أخيييييييييييييييييييييييييييرا
سبحان الله
 ..!!



رغم انه واقع للأسف لكن لازم نفكر نفسنا بيه دايما .. وخاصة النصاب المتدين .. ده كمان ممكن يكون شيخ بيتكلم فى غرفة بيسموها غرفة دينية ..
وبتدخل البنت هدفها انها تدعوا الى الله وتقرب من ربنا بسذاجة وعدم وعى ..
ويدخل الشباب " تقريبا بيبقى عندهم انفصام فى الشخصية .. يتكلموا وبعدين الكلام يكون على البرايفت..
والنتيجة : قلب مكسور .. وانطواء عن الناس … وغضب وسخط من الله تعالى .. خسران وحسرة فى الدنيا وخسران فى الآخرة
الغريب فعلا ان البنت او الشاب بيكونوا على يقين ان الطرف الآخر اللى بيتكلم معاه ده مستحيل يقبل انه يكون على فرض يعنى شريك حياته .. ونلاقى البنت بتقول عاوزة زوج صالح والشاب يقول عاوز زوجة متدينة .. على أى اساس طيب ..
هل تعتقدين اصلا ان الله هيبتلي انسان صالح عفيف
بوحدة بتعمل زى اللى بتعمليه والله أعلم بيه؟؟
وللشباب ايضا هل تعتقد بأن الله سبحانه وتعالى سيبتلي انسانة عفيفة بمن هم على شاكلتك ؟؟

أضف الى مفضلتك
  • del.icio.us
  • Digg
  • Facebook
  • Google
  • LinkedIn
  • Live
  • MySpace
  • StumbleUpon
  • Technorati
  • TwitThis
  • YahooMyWeb

ـــــــــــــــــــــــــــــــــــــــــــــــــــــــــ
التصنيفات : المراة | السمات:
أرسل الإدراج  |   دوّن الإدراج  

22 تعليق على “همسة ل أختي في الله احذري من هؤلاء…..(((بقلم // حبيبي خبيب)))”

  1. ibnyosry قال:
    يونيو 25th, 2007 at 25 يونيو 2007 1:32 م

    شكر الله لك على هذة امعلومات الطيبه وعلى هذا الرفع من الواقع

    ولكن إحيانا تضطرا أوضاع العمل او الدراسه او الاجتماعية للاحتكاك

    ياريت تعرض للأسلوب الامثل لتعامل

    حتى لا نقع فى حرج

    شكر الله لك

  2. saif elislam قال:
    يونيو 25th, 2007 at 25 يونيو 2007 7:03 م

    اه الحلاوة ده يا دكتور

    بصراحة خبيب ابدع ……….. ده يترفع له القبعة

    لا بجد عجبتنى جداً ……… وخاصاً النصاب المتدين

    اه دلوقتى بقه فيه نصبين …….. بس مش كتير

    عندما تجد الإسلام ينافق عليه … فهو فى قوة …………… فاحمد الله

  3. إخوانية مصرية قال:
    يونيو 27th, 2007 at 27 يونيو 2007 1:25 ص

    يادكتور هؤلاء لصوص الانترنت

    كلامك في الصميم هو دا صلب الموضوع

    وعلي فكرة يادكتور موضوع النصاب المتدين دا فعلا هوة نص الكلام بالضبط

    انا لا انسي يوم ما ارسلت لي صديقة غالية من حوالي 3 سنوات حوار دار بينها وبين احد من هؤلاء الذين يدعون الالتزام

    فاخبرتها اني لا يوجد ملتزم يحدث بنت بهذا الشكل

    كيف يقول ملتزم وهويلعب بقلب البنات

    ولاتقولي ان هناك بنت ملتزمة تحدث شاب بهذا الاسلوب

    وجزا الله اخونا خبيب علي هذا الموضوع الرائع

    وبستاذن حضرتك في نشره

    وجزاكم المولي الفردوس الاعلي اللهم امين

  4. أحمد محمد مرسي قال:
    يونيو 27th, 2007 at 27 يونيو 2007 12:32 م

    ابن يسري و سيف الاسلام شكرا علي المرور

    بس كنت عاوز اسمع رايكما في القضية و في كيفية تعامل الفتيات و كيفية الحفاظ عليهن من هؤلاء المحتالين

    اخوانية مصرية

    هؤلاء اللصوص لابد ان يكون اجتثاثهم من الواقع عن طريق اخواتنا الفتيات

    طبعا اتفضلي يا افندم وده حتاجة سؤال

  5. اشقةفلسطين قال:
    يونيو 27th, 2007 at 27 يونيو 2007 3:50 م

    بجد الموضوع ده خطير. كم اتالم عندما ارى زميلة معى فى القسم للاسف الشديد تعطى الاولاد محاضراتها وتلخيصاتها بدون ذرة خجل او حياء. وبنات اخريات لا تصاحبن الا الاولاد(حاجة صعبة اوى). رغم هذا فان الكلية تعتبر من اكثر الكليات التزاما عن كليات كثيرة رايتها تحتاج الى عمل دؤوب لانقاذ هؤلاء الفتيات( وده دور اخواتنا).

    جزاكم الله خيرا( لم اكن اعرف هذا الموقع قبل ذلك)

  6. أحمد محمد مرسي قال:
    يونيو 27th, 2007 at 27 يونيو 2007 7:42 م

    عاشقة فلسطين

    شرفتنا زيارتك و مروك

    و احنا هنا بنتكلم عن النصابين اللي بيحاولوا يتعرفوا علي الفتيات

    و خصوصا النصاب اللي يتظاهر بالالتزام و انه عاوز يتعرف من باب الدعوة الي الله و اختيار احسن طريق للدعوة و هو كاذب

    علي العموم نتمني تكرار الزيارة

  7. نور قال:
    يونيو 28th, 2007 at 28 يونيو 2007 4:18 ص

    السلااااااااااام عليكم ورحمة الله وبركاته

    موضوع رائع ، وتحليل منطقي لواقع مرير

    أريد فقط أن أسأل سؤالا …………. الشخص المخدوع يعتبر نصاب ولا لأ ؟؟؟؟

    يعني ممكن يكون في شخص مخدوع فعلا ……… منصوب عليه يعني

    ممكن يكون فاكر اللي بيعمله ده صح ……….. لكن مش في نيته نصب خالص ، ممكن يكون جديد في عالم النت كله أو الإلتزام …….. وده مبيكونش فاهم ابعاد الموضوع كلها وبينظر له من ثقب ضيق جدااااااا …… طبعا بيقع في الغلط وبيظلم معاه شخص تاني ممكن يكون هو كمان مخدوع أو عارف ( نصاب بجد بقى )

    وده بيحتاج فقط لتوضيح الرؤية

    وللأسف دول كتير وده بيضر نفسه أكتر ما بيضر الناس ، لأنه بيكتشف في الآخر أن نفسه كانت بتنصب عليه ……… بس هو منصبش على حد

    تحياتي

    نور

  8. mo'men mohamed قال:
    يونيو 29th, 2007 at 29 يونيو 2007 2:04 م

    أخى العزيز

    أنا معاك فى كل ما ذكرت

    ولكنى أعترض معك فى الأسلوب وفى طريقة عرضك للموضوع

    لأن ده بيتطرق الى الشبهات

    على العموم جزاك الله كل خير

    السلام عليكم

  9. مجهول قال:
    يونيو 29th, 2007 at 29 يونيو 2007 5:25 م

    يقول رسول الله ( صلى الله عليه و سلم ) “” ما أجتمع رجل وأمراة الا وكان الشيطان ثالثها “” فأعلمى أختى أنك بزيك الطاهر مطمع لكل ضعيف يرجوا أن يدنس تلك الطهاره لغيرة زُرِعت فى قلبه و أعلمى أن المرء السوء إن لم يستطع أن يرتقى بنفسه الى أخيه الصالح سعى أن يجذبه اليه والى الوحل

  10. مجهول قال:
    يونيو 30th, 2007 at 30 يونيو 2007 5:52 ص

    الكلام بين الرجل و المراة لو في حدود الادب و المصلحة فقط…لا حرمة فيه

  11. أحمد محمد مرسي قال:
    يونيو 30th, 2007 at 30 يونيو 2007 9:11 م

    forislam_4ever و mo’men mohamed

    شكرا علي المرور

    و ابداء الرأي

    و ان كنت اتمني ان م}من يظهر رايه و يذكر أوجه اعتراضه

    و مجهول و مجهول شكرا علي المرور

    وخصوصا النصيحة اللي كتبها المجهول الأول

    فأعلمى أختى أنك بزيك الطاهر مطمع لكل ضعيف يرجوا أن يدنس تلك الطهاره لغيرة زُرِعت فى قلبه و أعلمى أن المرء السوء إن لم يستطع أن يرتقى بنفسه الى أخيه الصالح سعى أن يجذبه اليه والى الوحل

  12. عاشقة فلسطين قال:
    يونيو 30th, 2007 at 30 يونيو 2007 10:39 م

    جزاكم الله خيرا, انا كنت اعلق فقط على الكلام الذى قبل موضوع النصابين. وهو اخذ المحاضرات…………الموضوعات دى مهمة جدا لكن عندى اعتراض بسيط وهو انها لا تفيدنا كثيرا لاننا ( اقصد الاخوات المشاركات) لا نحتاج لهذه النصائح لاننا والحمد لله لانقع فى هذه المعاصى الفظيعة. وارجو ان نتناقش فى موضوعات سياسية ……….اى موضوعات نستفيد منها

  13. مجهول قال:
    يونيو 30th, 2007 at 30 يونيو 2007 11:00 م

    فإن هناك دعوات هدامة قامت في صفوف المسلمين، زعزت العقيدة في قلوب كثير من المسلمين وعكرت صفاء العقيدة الإسلامية، وتدرجت في مدارجها حتى بلغت مبلغا ً خطيرا ً أدى إلى تفرق المسلمين إلى شيع وأحزاب، حيث يصدق عليهم قوله –صلى الله عليه وسلم: “ألا وإن من قبلكم من أهل الكتاب افترقوا على ثنتين وسبعين ملة، وإن هذه الملة ستفترق على ثلاث وسبعين، ثنتان وسبعون في النار، وواحدة في الجنة، وهي الجماعة”، رواه أحمد وأبو داود وحسنه الحافظ.

    ولا شك أن كل فرقة من هذه الفرق تزعم أنفسها أنها هي الفرقة الناجية، وأنها على الصواب، وأنها تتبع الرسول دون غيرها، علما ً بأن طريق الحق هو طريق واحد، وهو المؤدي إلى النجاة، وما سواه فهي طرق ضلال، تؤدي إلى الهلاك، كما ورد في الحديث، عن ابن مسعود –رضي الله عنه- قال: “خط لنا رسول الله خطا ً بيده، وقال: هذا سبيل الله مستقيما ً، ثم خط خطوطا ً عن يمينه وشماله، ثم قال: هذه السبل ليس منها سبيل إلا عليه شيطان، يدعو إليه، ثم قرأ: “وإن هذا صراطي مستقيما ً، فاتبعوه، ولا تتبعوا السبل، فتفرق بكم عن سبيله”"، (صحيح، رواه أحمد والنسائي).

    فطريق الحق هو التمسك بكتاب الله، وسنة رسوله –صلى الله عليه وسلم، وعدم مخالفتهما، كما ورد في الحديث: “تركت فيكم شيئين، لن تضلوا بعدها: كتاب الله، وسنتي، ولن يتفرقا حتى يردا على الحوض”، (صحيح، رواه الحاكم).

  14. عمر الشرقاوى قال:
    يوليو 3rd, 2007 at 3 يوليو 2007 8:16 ص

    بص يابرنس

    واضح انك والاخت خديجه بتقروالبعض كتير والموضوع اللى حضرتك كاتبه ده هى كمان كتبتوا واتنشر كمان فى الدستور الاسبوعى بصراحه ياخى دونن عن الاخوان كلامك مكلكع مش عارف ليه

    وحكايه النصاب المتدين واضح انك بتهزء الاخ الملتزم اللى مفروض انه من الاخوان كمحب لكم يعنى ومش عارف كمان انته بطريقه دى بتفتح باب كبير جدا من النصب خد عندك انته بتاكد نظريه ان فى نصاب ملتزم ويظهر الالتزام ويضحك على الناس ويسرق فلوسهم دى واحده

    كمان انته بتاكد نظريه ان الاخ الملتزم هو الشيطان بعينه يعنى لا نثق فى اى شخص ملتزم ممكن يكون حضرتك مش انته ملتزم برضو

    ممكن تكون البينت هى اللى نصابه وعايزه تبلف الواد

    والكلام جاى على معدتها وعلى هواها

    الانسان عباره عن كتله من المشاعر فى احساس بالاخر والجنس الاخر عايز تفهمنى حضرتك انك محستش بشعور تجاه انسانه محترمه قد تكون سبب فى التزامك

    تبقى مش انسان لو محستش بكده

    بص كمان يابرنس

    الدكتوره جهان الحلفاوى عارفها اكيد عارفها دى بقى من الاخوان وكانت مرشحه الاخوان وكانت بتعمل اجتمعات ولقاءات وتقبل فلان وتتكلم مع علان وتضحك لده وتضحك لده كل ده عشان ايه ؟ اكيد انته عارف

    مش عارف انته مش عايز الناس تحب بعض ليه كفايه بقى متخلنيش افتح

    بص كمان يابرنس

    من كتر الاحتكاك للاسف بين الاخوه بعضهم وبعض وحبهم لبعض وتفضيل الاخ فلان عن الاخ فلان خلى باللك من اللى جاى تحدث نوع من انواع الارتباط الجنسى دون ان يشعرو ويحب اخوه زى ما يحب بينت طبعا الفرق واضح بين الحبين اكيد انته فهمت قصدى كفايه عليك كده

  15. مجهول قال:
    يوليو 3rd, 2007 at 3 يوليو 2007 6:39 م

    معلش الشرقاوى بين عليه معقد نفسى

  16. أحمد عامر قال:
    يوليو 3rd, 2007 at 3 يوليو 2007 9:47 م

    ههههههههههههههههههههههههههههههههههههههههههههههههههههههههههههههههههههههههههههههههههههههههه

    بجد الموضوع أكثر من رائع و ضحكت كتير لأن الموضوع فعلا حقيقي و منتشر بشكل بشع

    وبعدين بسم الله ماشاء الله انت لميت الموضوع لمة كويسة جدا و كتبته ببراعة خرافية

    و لو أي حد دخل أي شات روم هايشوف من ده كتير

    و المهم مش بس نتكلم في بدون عمل و نبطل العادة دي و نبقى ناس عمليين

    المفروض اننا نشكل موضوع عن العنوان ده في وضع حلول وخطط زمنية لتنفيذ مايتم الاتفاق عليه بعد طبعا مانعلن عنه

    وانا مستعد للمشاركة في عمل أي شئ للإهتمام بالموضوع ده

    وبعدين على رأيك ( إذا أردت فاطمة - الزهراء - فلابد أن تكون عليا )

    أه من الحق مال الكوابرية هما وحشين ولا ايه ….. لا كده نزعل و احنا لسه بنتعارف

    أما بجد مدونتك جميلة و الموضوع يجنن و كمان هادف بس ياريت يدخل الطور التنفيذي

    و أخيرا أحب أشكرك و أقولك ( هذا الشبل من ذاك الأسد )

    أشوفك بخير

    سلام

  17. عمر الشرقاوى قال:
    يوليو 3rd, 2007 at 3 يوليو 2007 11:34 م

    الى المجهول لو راجل بين نفسك وخليك شجاع وعندك الشجاعه الادبيه وكلمنى لانك انت اللى باين عندك العقده تحب اقللك العقده ايه هى عندك ياحبيبى هاجس جنسى كبير ودى عقده مرضيه خطيره كما قال الشيخ الغزالى عن النقاب واهله ديما اللى بيلبس زوجته نقاب دا مريض وعندو هاجس جنسى هو الغزالى ده مش اخوان برضو

  18. أحمد محمد مرسي قال:
    يوليو 4th, 2007 at 4 يوليو 2007 12:08 ص

    السادة الزوار

    ليتنا نستفيد من بعض و نفيد

    لا بد و ان نتحلي باخلاق اسلامنا العظيم

    لا بد و ان يصبر و يتحمل بعضنا بعضا

    السادة عمر الشرقاوي و مجهول

    اتقوا الله في انفسكم و افيدونا

    ناخذ من كل شخص رايه و خبرته و نطبق ما يوافق قناعتنا

    استحلفكم بالله لا تغضبوا و لا تحزنوا و كونوا اخوانا

    السيد الفاضل احمد عامر

    جميل جدا التركيز علي الجانب العملي بس كان يا ريت لو توضح زي ايه؟؟ كيفية الاسقاط و التنفيذ و الانطلاق

    السيدة الفاضله عاشقة فلسطين

    انا معك قد يكون الموضوع ممل او من وجهة نظرك لا يمثل ظاهرة لكن لابد من التنويع بين الاجتماعي و الدعوي و الفكري و الثقافي و السياسي

    مش كله سياسي

    و اخيرا

    كلكم شرفتوني

    كلكم ارائكم علي راسي

    كلكم احبكم في الله

    كلكم منكم استفيد

  19. عاشقة فلسطين قال:
    يوليو 4th, 2007 at 4 يوليو 2007 11:15 ص

    الا خ الذى يتكلم عن الكتورة جيهان اريد من حضرته يوضح ما يقصد لاننى لم افهم ما يقصده حضرته او اننى فهمت خطاْ. وما المقصود من (الملتزم الذى يضحك على الناس ويسرق فلوسهم).

    واحب ان انصح الاخ نصيحة (ان الكلام مش بالاسلوب والطريقة دى) ولا ادرى لماذا الاخ متضايق من الاخوان بهذه الصورة.

    اللهم اهد شباب وبنات المسلمين وردهم الى دينهم مردا جميلا

  20. عمر الشرقاوى قال:
    يوليو 4th, 2007 at 4 يوليو 2007 7:03 م

    الاخت عاشقه فلسطين الدكتور جيهان احترمها واقدرها لا شك عندى انا فى هذا ولكنى ضربت مثال يا اختى العاشقه بان الاخوان وسياستهم العامه تتنقض مع كلام الدكتور احمد

    وبعدين انا اتكلم بالاسلوب اللى يريحنى مش انتى اللى هاتعلمينى اتكلم ازاى

    والا انا بحب الاخوان جدا جدا كمان وكنت مندوب الدكتور فريد عبد الحليم عضو الاخوان عن دايره فاقوس فى احد اللجان لكن انا لايعجبنى بعض الاشخاص الذين يتحدثون ويتشدقون بامور هم انفسهم يفعلونها

    عاشقه فلسطين دى معناه ايه ؟ معنها انك بتحبى وتكرهى وتعشقى كمان

    كل واحد بيقول انه بيحب ليلى وليلى منهم براء

  21. اخوانية مصرية قال:
    يوليو 4th, 2007 at 4 يوليو 2007 11:33 م

    هوة في ايه ياجماعة

    الموضوع كله بيتكلم عن الشباب الي بيضحكوا علي البنات باسم الحب عن طريق النت اوغيره وطبعا دول ليهم اصناف وموجودين في واقعنا

    وكمان في بنات وربنا يهدي

    ولا يمكن انا فهمت الموضوع غلط ؟

    الله اعلم

    خير ربنا يحفظنا جميعا ويحفظ شبابنا وبناتنا

  22. DR.HAMAS قال:
    ديسمبر 29th, 2007 at 29 ديسمبر 2007 9:31 م

    د.حماس

    ———

    أحييك أخى ناقل الموضوع إلى متصفحى مدونتك

    أحييك أخى كاتب الموضوع .. و الذى لا أجد أوصافا لك إلا (المبدع , المخلص , المصلح )

    أتمنى أن تسمحوا لى بأن أنقل الموضوع إلى مدونتى مع الاحتفاظ باسم كاتبها و باسم المدونة التى نقلتها منها

    و هدفى أن تعم الفائدة

    و ألا تتكرر هذه المسلسلات الهزلية مع أخواتنا المسلمات

    بالأخص أن غالبية-إن لم يكن كل- مستخدمى النت و المدونين (شبــــــاب و فتيـــــات)

    و هذا عنوان مدونتى

    http://dr-hamas.blogspot.com/

    أتمنى أن تزورونى

    و سأنقل الموضوع عندى من الآن … لعلمى أنكم تبتغون بها هداية الشباب

    و لكن إن كان لديكم رأى آخر أو خلاف ذلك فأرجو إبلاغى ذلك بالتعليق على مدونتى



اكتب تعليــقك
الإسم الذي سيظهر على التعليق
مشتركي مكتوب
اسم آخر

« همسة في أذن كل فتاة : انا والملتزم والنت
فلسطين….هل لنا دور »